24. apríl 2013

Á morgun, sumardaginn fyrsta verður opið hús í Bæjarleikhúsinu kl. 14-16. Gestir og gangandi eru boðnir velkomnir í heimsókn og verður boðið upp á kaffi og vöfflur í tilefni dagsins. Einnig verður hægt að prófa að spreyta sig í hinum ýmsu sirkuslistum, en þeir Egill Kaktuz Wild og Daði Sigursveinn Harðarson munu leiðbeina áhugasömum. Hlökkum til að sjá ykkur!






 

4. mars 2013

Föstudaginn 8. mars verður sýningin KÁNTRÝ MOS frumsýnd hjá Leikfélagi Mosfellssveitar. Leikstjóri er Þórunn Lárusdóttir og höfundur María Guðmundsdóttir. Um tónlist sér Birgir Haraldsson ásamt hljómsveit.
Miðapantanir í síma 566 7788 og miðaverð 2000 krónur.

Frumsýning föstudaginn 8. mars kl. 20
2. sýning föstudaginn 15. mars kl. 20
3. sýning föstudaginn 5. apríl kl. 20
4. sýning sunnudaginn 7. apríl kl. 20
5. sýning föstudaginn 12. apríl kl. 20
6. sýning sunnudaginn 14. apríl kl. 20


          

3. nóvember 2012
 
Sunnudaginn 18. nóvember kl. 16 verður leikritið Hamagangur í helli mínum frumsýnt hjá Leikfélagi Mosfellssveitar. Þetta er nýtt íslenskt jólaleikrit fyrir alla fjölskylduna eftir Maríu Guðmundsdóttur. Leikstjórar eru Ólöf Þórðardóttir og Eva Björg Harðardóttir.
Sýningar verða í Bæjarleikhúsinu Mosfellsbæ á sunnudögum kl. 16. Miðaverð er 1500 krónur og miðapantanir í síma 566 7788
Á Facebook síðu leikfélagsins má skoða myndir frá æfingum http://www.facebook.com/?sk=nf#!/leikfelag.mosfellssveitar 
 

12. október 2012


Nú eru hafnar æfingar á nýju jólaleikriti fyrir börn sem kallast Hamagangur í helli mínum. Höfundur er María Guðmundsdóttir og leikstjórar Ólöf Þórðardóttir og Eva Björg Harðardóttir. Stefnt er að frumsýningu sunnudaginn 18. nóvember og verða sýningar á sunnudögum í nóvember og desember.   


       

12. ágúst 2012

Föstudaginn 10. ágúst var söngleikurinn Gauragangur frumsýndur í Bæjarleikhúsinu.  Það eru 13-16 ára nemendur Leikgleði, sumarnámskeiða Leikfélags Mosfellssveitar, sem taka þátt í uppsetningunni ásamt hljómsveit. Kennarar í sumar hafa verið Sigrún Harðardóttir, Agnes Wild, Eva Björg Harðardóttir, Elísabet Skagfjörð og Halldór Sveinsson.

Það má segja Bæjarleikhúsið sé helgað ungu fólki á sumrin. Í sumar hafa yfir 80 krakkar á aldrinum 6-16 ára tekið þátt í Leikgleði námskeiðunum, þar af 30 í 13-16 ára hópnum. Krakkarnir hafa lagt sig alla fram og mega vera stoltir af þessari sýningu, enda mikið hæfileikafólk á ferð bæði í leik, söng og dansi. Í sumar hafa krakkarnir einnig tekið virkan þátt í leikmyndar- og búningagerð, markaðsmálum og leikskrár- og plakatagerð og þannig kynnst fleiri hliðum leikhúslífsins.

Söngleikurinn Gauragangur fjallar um Orm Óðinsson, ungan sjálfskipaðan snilling, fjölskyldu hans og vini. Sagan, sem er eftir Ólaf Hauk Símonarson kom fyrst út árið 1988 en á samt mjög vel við árið 2012. Það sama á við um tónlist hljómsveitarinnar Nýdönsk sem samin var fyrir söngleikinn árið 1994.

Næstu sýningar verða sunnudaginn 19. ágúst kl. 18:00, þriðjudaginn 21. ágúst kl. 19:30, föstudaginn 24. ágúst kl. 19:30 og lokasýning laugardaginn 25. ágúst kl. 16:00. Miðapantanir eru í síma 566 7788 og miðaverð aðeins 1500 krónur.


 

   

12. maí 2012

Kæru leikfélagar.
Miðvikudaginn 30. maí kl. 20 verður aðalfundur Leikfélags Mosfellssveitar haldinn í Bæjarleikhúsinu. Vonumst til að sjá sem flesta!


        
 
    

10. maí 2012 

Í nógu verður að snúast í Bæjarleikhúsinu í sumar eins og undanfarin sumur. Leikfélag Mosfellssveitar býður upp á Leikgleði, fjölbreytt námskeið fyrir börn á aldrinum 6-16 ára. Námskeiðin hafa notið mikilla vinsælda og er nú þegar að verða uppbókað á nokkur. Á námskeiðunum vinna nemendur með sjálfstraust, framkomu og framsögn, sigrast á feimni og kynnast hinum ýmsu þáttum sem snúast að leikhússtarfi. Í lok hvers námskeiðs er sett upp sýning sem hentar hverjum aldurshópi. Elsti hópurinn (13-16 ára) hefur undanfarin ár sett upp metnaðarfullan söngleik. Í fyrra var söngleikurinn Hársprey settur á svið og voru sýndar átta sýningar fyrir fullu húsi.

Laugardaginn 23. júní opnar leikhúsið dyrnar á gátt og býður gestum að koma og skoða aðstöðuna, spjalla við kennara og eldri nemendur, prófa leiklistarleiki á sviðinu og grilla pylsur. Auk þess geta allir sem hafa einhvern tímann sótt námskeið hjá Leikgleði, eða eru að koma í fyrsta skipti í sumar, komið í myndatöku og skráð sig hjá Leikgleði. Mörg fyrirtæki hafa haft samband við leikfélagið þegar þeim vantar unga leikara í verkefni og því er kominn tími til að safna öllum saman á skrá. Hver veit nema einhver fái hlutverk í stórmynd í kjölfarið.

Allar nánari upplýsingar og skráning á námskeiðin er á www.leikgledi.tk.
     


    
 
 
 

13. mars 2012

Föstudaginn 16. mars verður leikritið Andlát við jarðarför frumsýnt hjá Leikfélagi Mosfellssveitar. Leikritið er byggt á bresku kvikmyndinni Death at a funeral eftir Dean Craig og leikstjóri er Guðný María Jónsdóttir. María Guðmundsdóttir ásamt Guðnýju Maríu sáu um handritsvinnu. Eva Björg Harðardóttir hannar leikmynd og búninga og Hörður Guðjónsson lýsingu.

Leikritið fjallar um fjölskyldu sem hittist í jarðarför fjölskylduföðurins. Eldri bróðirinn, sem enn býr hjá foreldrum sínum ásamt konu sinni, tekur að sér  að skipuleggja jarðarförina og flytja minningarorðin. Það sem upphaflega virtist vera tiltölulega einfalt verkefni verður honum hins vegar fjötur um fót þegar
 alls kyns óvæntar uppákomur gera jarðarförina að algjörri matröð. Ofskynjunarlyf, óþolandi gömul frænka, hrokafullur bróðir og kvennabósi, tuðandi eiginkona og svo dularfullur gestur úr fortíð föður hans sem reynir að afhjúpa hneykslandi leyndarmál hins látna.

Alls taka um tuttugu manns þátt í uppsetningunni en sýningar eru í Bæjarleikhúsinu við Þverholt í Mosfellsbæ. Þetta er bráðskemmtileg og fyndin sýning sem enginn má láta framhjá sér fara.

Næstu sýningar eru sem hér segir:

Föstudaginn 16. mars kl. 20:00
Sunnudaginn 18. mars kl. 20:00
Föstudaginn 23. mars kl. 20:00
Sunnudaginn 25. mars kl. 20:00
Föstudaginn 30. mars kl. 20:00
Laugardaginn 31. mars kl. 17:00.

Miðaverð er 2000 krónur og miðapantanir eru í síma 566 7788.





     

28. febrúar 2012

Dagur Listaskólans verður með frábrugðnu sniði í ár. Áhugavert og spennandi námskeið verður haldið laugardaginn 17. mars, þar sem unnið verður að smíði "tónverks" . Námskeiðið er opið öllum sem stunda nám í tónlistardeild Listaskólans, eru í Skólahljómsveitinni, í Myndlistarskólanum, eða eru í starfi Leikfélagsins og eru á aldrinum 12-16 ára, þ.e. fæddir á árunum 1995 – 2000.

Námskeiðið fer fram í sal Varmárskóla. Mæting er kl 09.30. Unnið er til kl. 12.00 og þá er boðið uppá pizzuveislu og svo unnið aftur frá 13.00- c.a. 15.00. Tónleikar verða kl. 16.00 fyrir foreldra og aðra gesti. Skráning fer fram á skrifstofu Listaskólans (Háholti 14, 4. hæð) kl. 13.00 – 17.00 og lýkur skráningu 5. mars. Innheimta þarf smá þátttökugjald eða 1000 kr. Við skráningu þarf að koma fram nafn, kennitala, sími og hvort/hvaða hljóðfæri viðkomandi spilar á. En það er líka hægt að taka þátt án þess að kunna á  hljóðfæri.

Þetta verður mjög skemmtilegt og áhugavert og eru nemendur hvattir til að taka þátt og skrá sig sem allra fyrst! Unnið er með hópnum að því að spila og skapa tónverk, sem er svo flutt fyrir foreldra og gesti í lok dags.Allir spila á hljóðfæri í verkefninu og þeir sem eru í tónlistarnámi mæta með sín hljóðfæri og nota þau. Nemendur koma til með að spila lærða kafla í tónverkinu, en fá einnig tækifæri til að semja sína eigin hluti, sem eru tvinnaðir saman í verkið, sem og textagerð. Hugmyndin er sú að allir fái að njóta sín, og eru jafn mikilvægir verkefninu, hvort sem um skólaðan tónlistarnemanda er að ræða eða óskólaðan.
 
Stjórnendur verkefnisins eru Þórdís Heiða Kristjánsdóttir og Hildur Guðný Þórhallsdóttir, en þær hafa unnið þessi verkefni víða undanfarin ár í grunnskólum og tónlistarskólum.
  
 

29. janúar 2012

Nú eru hafnar æfingar á leikritinu Andlát við jarðarför hjá Leikfélagi Mosfellssveitar. Undanfarna daga hafa staðið yfir miklar framkvæmdir við sviðsmyndargerð, en stefnt er að frumsýningu í mars. Leikstjóri sýningarinnar er Guðný María Jónsdóttir, en alls taka yfir tuttugu manns þátt í uppsetningunni.